So Mekato

Saturday, January 23, 2016

Dofañ Cañjañ Goñdu Yarko

Abotani lu lwdu pwmi' mi gwto kula, koga' mi'ri mi gwto kula pyonw diruñ mi uunw diruñ mi ciñja bwfì kunwñ. Abotani mi Úì atañ kau kakvr tw’ku.

Hopa, Úì atañ hw bwdi dikvr haku. Abotani mi bwdi ba'lo dupa hwla bwhiñ babì mi bìikasa, pwsa babo bìikasa hwla azo' hatw’. Abotani ja mò mi bwdi pfwha dunw mi himpá matw’. Ho, mò Úì agiñ ho sohbo mola babì bìika hatw’. Úì atañ hw mòlu bipyo lala la Tani mitrv bìiká totè hwla lutw’.

Kamìho, Abotani babì bìika kwleyu Úì atañja Abotani mi pabú ago ho torpa limbw tola bikur hala kuma dopa bufiku yu. Tani ja kwdi to'cì laku jama, yapuñ hotvr cacì laku jama apfa pa dapa fiku. Abotani mi tabyuñ tóoci, ta'mo tóoko lo torpw rwgan ho torliñ bwto la atw’fi ku. Abotani haqw dwgo ja dwpa kuma da’fiku yu. Dwgo dwpa kumanwñ aju’yu’fiku yu.

Kami ho Tani Barmw Dofañ Cañjañ tarò la swyiñ dormiñ taka bwkele, Hardo Layù swyiñ luko kunwñ Tani ami' si mi’be' dorañ ke, aha si sa'tu dorañ ke, swpo’yo ma swke hwla luko tw’. Wci Rwmbi hw dañsuñ pa soliñ la Tani mi dwgo bwbi tw’. Tau Yamu hw muru yamu ruma pa muru buhubi fa tw’.

Hokoda, Tani swyomarañ ko’da hwla la goñdu lute tw’. Dofañ Cañjañ ka goñdu yarnwñ, “Tani lwdu-pwmi’ mi Tubo ka byodiñ pa bufa toku, ho Tani ka koga'-mi'ri mi Fabo ka byopa pa gwto ku. Tani ka alì mi tartv yo. Tani zima ko’da Pifa koñtw’ sala kima ke, Myotw koñtw’ sala kima ke; poxe-pore tañkako’pa jalo Tani mi atw’ swto,” hwla, Dofañ Cañjañ Tani Barmw ja goñdu lutw’ ku.

Hopa Úì atañ hw Tani ka lwdu-pwmi’ mi lapa' twku, koga' mi'ri mitvrv lapa tw’ku.

Bwpw' daka taka nwsi mi ciñkato:

1. Tani mi hu pe bwdi tw’nw?
2. Tani mika dwgo bubi bosi hu pe?
3. Tani mi hu pe murù buhu bitw’nw?
4. Tani Úìzi ka poñko ho hu pe goñdu lutw’nw?

[Kenwbo: Pura Lailang]

Dofañ Cañjañ Goñdu Yarko

Abotani lu lwdu pwmi' mi gwto kula, koga' mi'ri mi gwto kula pyonw diruñ mi uunw diruñ mi ciñja bwfì kunwñ. Abotani mi Úì atañ kau kakvr tw’ku.

Hopa, Úì atañ hw bwdi dikvr haku. Abotani mi bwdi ba'lo dupa hwla bwhiñ babì mi bìikasa, pwsa babo bìikasa hwla azo' hatw’. Abotani ja mò mi bwdi pfwha dunw mi himpá matw’. Ho, mò Úì agiñ ho sohbo mola babì bìika hatw’. Úì atañ hw mòlu bipyo lala la Tani mitrv bìiká totè hwla lutw’.

Kamìho, Abotani babì bìika kwleyu Úì atañja Abotani mi pabú ago ho torpa limbw tola bikur hala kuma dopa bufiku yu. Tani ja kwdi to'cì laku jama, yapuñ hotvr cacì laku jama apfa pa dapa fiku. Abotani mi tabyuñ tóoci, ta'mo tóoko lo torpw rwgan ho torliñ bwto la atw’fi ku. Abotani haqw dwgo ja dwpa kuma da’fiku yu. Dwgo dwpa kumanwñ aju’yu’fiku yu.

Kami ho Tani Barmw Dofañ Cañjañ tarò la swyiñ dormiñ taka bwkele, Hardo Layù swyiñ luko kunwñ Tani ami' si mi’be' dorañ ke, aha si sa'tu dorañ ke, swpo’yo ma swke hwla luko tw’. Wci Rwmbi hw dañsuñ pa soliñ la Tani mi dwgo bwbi tw’. Tau Yamu hw muru yamu ruma pa muru buhubi fa tw’.

Hokoda, Tani swyomarañ ko’da hwla la goñdu lute tw’. Dofañ Cañjañ ka goñdu yarnwñ, “Tani lwdu-pwmi’ mi Tubo ka byodiñ pa bufa toku, ho Tani ka koga'-mi'ri mi Fabo ka byopa pa gwto ku. Tani ka alì mi tartv yo. Tani zima ko’da Pifa koñtw’ sala kima ke, Myotw koñtw’ sala kima ke; poxe-pore tañkako’pa jalo Tani mi atw’ swto,” hwla, Dofañ Cañjañ Tani Barmw ja goñdu lutw’ ku.

Hopa Úì atañ hw Tani ka lwdu-pwmi’ mi lapa' twku, koga' mi'ri mitvrv lapa tw’ku.

Bwpw' daka taka nwsi mi ciñkato:

1. Tani mi hu pe bwdi tw’nw?
2. Tani mika dwgo bubi bosi hu pe?
3. Tani mi hu pe murù buhu bitw’nw?
4. Tani Úìzi ka poñko ho hu pe goñdu lutw’nw?

[Kenwbo: Pura Lailang]

Monday, January 18, 2016

Tani Bwdi

Abotani myw buuduñ-buuduñ buuka swbwfi, Tani alíi ja kapa kumafí. Hwra'pa Abotani myw mete tw’.

Mete bwkele Hasañ Buluñ mi kapa la myw buha tw’. Hwmi myw buukeke lwdu pwmi' mi myogw tw’mi, koga' mi'ri mi myogw tw’mi. Lwdu pwmi' koga' mw'ri mi gwkele Abotani Pyonw atúu da’komi, Uunw atúu dùukomi kaxa'-kare kapa kaja gwfi yu.

Hwko ho yulo, Abotani lwdu pwmi’ mi gwto kula carv-dirv la pyakuñ-perv mi, pero-afañ mi, pa’kvr la da’fiku yu. Tubo Haxe mi tudvr lokele, Fabo Hale mi tudvr lokele, Myotw Piifa, Acu Abyo, Diñgyañ Sww, ho xwbe-xwbe Úì atañ hw Abotani mi ciñci lakumafi yu. Abotani cile’ ja’pa, cixo ja’pa duliñ twmi.

Úì atañ hw Tani mi kariñ kakvr zatw’ku. Tani mi Úì kone tvrv ayapa hinw zikumatw’.

Hwmi miji' aguñpa axáa luko kunwñ:

"Gywnw ajvr jarliñ, piifa ajvr jarliñ, 
Tubo ajvr, fabo ajvr jarliñku la
 
Tani mi Uunw bwdi dikvr hatw’ kwfi’
Pyonw bwdi diikvr hatw kwfi’ku.”


Bwpw' daka gohiñ he mi ciñkato:
1. Lwdu pwmi' nw pe?
2. Koga' mi'ri nw pe?
3. Lwdu pwmi' koga' mi'ri no hokw pe Abotani myogw tw’nw?


(Kenwbo: Pura Lailang)

Saturday, January 16, 2016

Abotani ka Myw Bwko Miguñ


Abotani myw kapa kuma, oho tvrv kapa kuma pa da'tw’ ku. Dwfañ Dwbyu myoogù gwtw' ku. Twni Ruñgya mi apa’tw' ku. Tariñ Ta'ti zi swle’tw’ ku.

Miji' aguñ pa abba-apa hw luko kunwñ: "Myw pwsi oho pwsi su'pa kuma fí."

Hopa, Abotani Kusu' Yasañ mi myw buka kele ja pepu' tabu mi koga' twxe mi atúu bubwfi. 

Abotani, Sudu Patu' mi myw buka kele swre ka twxe, twpe' ka tano mi at
úu bubwfi.

Abotani Hai Bwzí mi myw buka kele tari-tapyo mi, mwdo-yasi mi oho bugwfi yu.

Niñxá Bwzí mi, Niya Bwzi mi myw buka kele ja doli-pwli mi bupa bwfiyu.

Iñdw Bwzí mi myw buka kele ja tabuñ doli mi bupa bwfiyu.

Abotani myw ja budvr 
lakuma pa da’tw’ku. 

Ho hwra' Pyodu Bwzí mi myw buka tw’. Hwmi bukele dwma ganda mi buliñ bwfi. Hwko hokw dwme agw tw’.
 
Nitu Bwz
í mi hwra’ myw buka kele sa'tu doli mi bupa swtw’.

Hwra'pa Abotani myw menw hw Pwla
ñ Bwzí mi myw pa bukadu hwla mya’lo mi fa’xa' ko’tw. Mya’lo mi fa'xa’ ko’la kulala càlo geko ho afí he'ka ko’la dutw’ ku.

Abotani pa alíi kapa kumafì. Abotani alíi pa mekiñ do hwla hinduñ la da’tw’ ku.


Bwpw' daka tahw nw’mi ciñkato:
1. Kusu' Yasañ ka oho mi amfañ lukato.
2. Twpe’ si huko hokw pe oho bugwnw?
3. Pwla
ñ Bwzí
hu pe ?

(Kenwbo: Pura Lailang)

Friday, January 15, 2016

Tariñ Ta'ti zi ka Swko

Abotani Dikañ Bogo-Himma Swxó ho mò ka oho azè hemi mebóla intw’. Kaduñ kaduñ kakatw’, hojalo oho azè mi kapa kumatw’.

Kami-kalo ho Yasi Pari mi kapa lala la takatw’, “Qwka Tariñ Ta'ti zimì kapa masu ha?".

“Qo nwka Tariñ Ta'ti zimì ka yasi buho nanwzañ ho ali lwmiñ doku nw," hwla lute’ hela Yasi Pari goóle' gwtw'.

Ho hwra'pa iñjo-iñjo iñbwkele Fumpiñ Taxw mi kapa bwfi. Abotani hwra’ Taxw mi taka tw’, “Qwka Tariñ Ta'ti zimi kapa masu ha?”

“Qo nwka Tariñ Ta'ti zimi yasañ ba'ho nanwzañ ho diñta’ hátvr donw”, hwla lukote’la Taxw hw fole' gwtw'.

Kami ho mejo-mejo mebw kele fiha du'nwñ mi tapa tw’.
 
Ho Abotani lutu la lutw', “Huya na ap
úu e'do nw? Qwmi e'pu dwla a”.

“Abotani ka oho Punu Tariñ zi Swro Ta'ti zi co”, hwla lukotw’.

Ho Abotani kala’ tw’ku. Bezi mi luko twku, “Qo Abotani nwzì ka abba ke”. 

Ho Tari
ñ Ta'ti zi Abotani mi luko twku, “Qwzi kw turo pago, hiruñ lago mi mwja lobw du. Pwì Ràgyo' bo kontw’ da qwzì ka milo mwgo da’ne kunw. Hwmi milo mwte' hekula qunu iñba swku sa".


Kami ho Pwì Ràgyo' mi azèru e'lo bwfì ku. Hwka adiñ mi ba'gw dupa hwla seh xwlw' gwla Punu Tariñ ba'ri’ gw. Adiñ hw aì haja’la seh bare' gwla hui nw Punu Tariñ ka lwge' mi hure'. 

Swro Ta’ti ja abba mi puyu luko tadu kupa hwla xe'jo bwla iñku. Zibya haji iñdu hwla mò ka piñjañ mi yabiñ pipo.

Hwtañpa azèru Abotani mi kapa kumapa swle' tw’.


Bwpw' daka goqo-he taka nw’mi ciñkato:
1. Abotani Tariñ-Ta'ti zimì no ho mete tw’ku?
2. Abotani mi oho meteko limbo ho hu-hu na irw' tw’nw?
3. Tari
ñ-Ta'ti zika kami ja’pa swre e'lo nw’si nw amfañ hwla?
4. Yabi
ñ si nw pe?
5. Tari
ñ - Ta'ti zi nwtañpa swtw'?

(Kenwbo: Pura Lailang

Wednesday, January 13, 2016

Abotani oho - Tariñ-Ta'ti

Abotani ka myw buutu ja’hw Ayo Dwfañ Dwbyu. Dwfañ Dwbyu oho pa milobo azè he dùutw’ - Punu Tariñ zi Swró Ta'ti zi. Abotani ka urú atañ hw aya cañcañ sañqola dùupa, Twni Ruñgya hwnwñ zimw akó hw Abotani mi kabyo hatw'. 

Abotani mi Twni Ruñgya lu, “No qwmi myw buupe. Qwmi myw buufí milo ají-fa'pyo mwgo mi hina mapa mwci ke.”

Abotani Twni Ruñgya mi lu, “Dwfañ Dwbyu ají mwma ha ena? Mò tvrv aya pa ají-fa'pyo mwsu do.”

Ho Twni Ruñgya lu, “Qo mò ka alo mwnwñ mi koñci mwcì, koñcì mwnwñ mi lekú mwci. Palw' rafañ mi keele raqo mi paka tope”.

Abotani hopa Twni Ruñgya zimi Dwfañ Dwbyu zimi palw' rafañ sa’he keele raqo sa’he pabi lala la aji mwka swke nintw’.

Kami ho azìru ude áafiku. Ho kaka bwke le Dwfañ Dwbyu palw' keele mi abuya mi mwxwñma pa ba'kur gwtw' ku. Twni Ruñgya kw’mi hi'xa dado mwxwñ gwku la ba'lw gwfì kunwñ. Abotani hiñdapwla hinwñ hw Twni Ruñgya kw’si palw' rafañ keele raqo simi mwxwñ mwja gwla balw' gwdo kunwñ, Twni Ruñgya ají mwga yatw’pa hiñda lala la mòmì myw pa dùugw tw.

Hopa, Ayo Dwfañ Dwbyu myogu tw’ku. Punu Tariñ zimì Swró Ta'ti zimì Tani agiñ ho apa’ bitw’ku. Permo Mwlo (Imò) mi myota’ gwtw ku.

Kamì ho Twni Ruñgya Abotani pa wqa buufimi kele Tinw Tiñsañ mi Ranw Rasañ mi oho buutw’. Tariñ Ta'ti zi lwbañ ba'du la, swre niñsañ dola hwfinwñ. Abotani qwka oho ahiñ mi nwtañ lupa’ du hwla lula la, Tariñ-Ta'ti zimiya mompa tw’.

Kami hoyulo, Abotani Twni Ruñgya ka ají mwkor mi kaateku kele mò haqwja ají mwkor kapá kuma tw’mi. Yapuñ Lañta’ hwla yalañ pohe dotw’; hwko ho palw'-keele mi Twni Ruñgya kw’mì mwxwñ gwla balw' gwtwku mi.
 
Abotani kam
ìkalo ho Twni Ruñgya mi apa' te’ku la Punu Tariñ zimi Swró Ta'ti zimi mebo tatw Ku. Miji aguñ pa axáa luko nenw,

“Tani dwrì pa bu'ka kwle ja,
Tariñ ka pwsi si suka de kele ja,
Dikañ ka bo’go xobo ja nebyo.
Ta'ti de pwsi si suka ja kele ja,
Hima ka swxó so xobo ja nebyo."


Bwpw' daka goqohe taka nwmi ciñkato:
1. Humi pe Abotani myw buupyópa buunw ?
2. Dwfa
ñ Dwbyu ka oho amfañ mi luko lukato.
3. Twni Ru
ñgya oho hu pe?
4. Twni Ru
ñgya palw'-keele mi no ho pe mwxwñ gwtw’ nw?
5. Palw' nw pe? Keele nw pe?
 

(Kenwbo: Pura Lailang)