Taruu-Tapiñ zika Tani Bwdí

Ayu hokw Taruu zi Tapíñzi asooswla Tani bwdinw. Taruuhw daruho, Tapiñhw dorwho mwsi’-mwsi’swla Tanimi bulopa mwnw. Tani ka zikumaho tarv swlofihe Tani oho atañmi bwdi dikañla du. Mo azi daru-dorw peñkoho kwrañpa’la zatu akoho kapa swdu.

Dorw aafiho, Taruuhw Tani lemba hokw iñduku. Tapiñhw Tani lemba aapa aadu. Azuru zatuho kapaswla lurw’swdu.

“Swzañ nwtañ nena, Taruu?” Tapiñhw takadu. “Tani oho atañmi ice bulo mate’ha?”

“Aye! Mwxe ja’mi mwkaswte’,” Taruuhw lukodu. “Tani oho atañsi pwbyw hajido. Bulo layomake.”

“Nwtañpa hw ho?” Tapiñhw takadu. “Mo lu nwtañja’pa hwmwkane pwbyw ha’doku ho?”

“Alo fiku milo alu-ale mwda’lama, ayo fikumilo keñte bwpw’ho paragwtola doo,” Taruu hw ludu. “Qo adañ butola, dañso butola xooka jalo xoocilayoma.”

“Ho hefa kwneto,” Tapiñhw ludu. “Qo azábo atañmi mwka heso.”

“No ada mwla tafibyo ha? Qo kwlo ali-ala’ gwtola, ai-ale’ gwtola mwlama. No ali-gwjema, ala’ gwjema, ai gwjema, ale’ gwjema, nw mwpa heñdo?” Taruu hw ludu.

“Qo mo lumi abya arañho kafabwdola, ai gwmapa asw’ tafi. Qo mo lumi sukuñ pwtiñho kafabwdola, ala’ gwmapa pita’ tafi,” Tapiñhw ludu.

“Ajiñbo, hokoda aya mwkahetwka,” hwla Taruu hw lute’hela mo ka gañda ho iñduku.

Hwra’pa daru-dorw peñkoho Taruu-Tapiñzi zatuho kapa swdu kwfi. Tapiñhw ato gañda ho iñduku ho, Taruu hw Tani gañda ho iñdu.

“Ajiñbo Tapiñ, Miyu-mima atañmi ice bulo te ha?” Taruu hw taka du.

“Tani oho atañsi mwdverlama ke,” Tapiñhw ludu. “Abya arañ kafa tomwlo abi gwtola, tarw gwtola to’to. Sukuñ pwtiñho kafa tomwlo pufe gwtola, byopa gwtola aato. Ude uraho abo tomwlo yamu patrv swbwtola qo aruñho apo’lajema. Qo mwha swko kapa mate’.”

“Hokoda qo mwsi mwka hasu hekusoñ,” hwla Taruu hw lula, Tani lembaho asi’du.

Hwtañpa, swlofihepa Taruu zi Tapiñ zi qunu lemba ho rusi’-rusi’ ruhadu. Hopa qunu aro-aya swla Tani oho hw pyapiñpa duhiñ keñdo.