Jesus ka Oho Bwko

 Ayúu kozañ ho Nazareth hwla lemba poqe ho Mary hwla zimuñ deñki kone dùufinwñ. Mary ude alu-ale swnwñmi hempvr ayapa mwla, miyu kapanw hemi heñla, ho Úì mi hempvr heñje-tajela mw. Mò Joseph hwla yapa akó agiñ ho milò iñdukupa hwla azuru luge’swto kula dotw’.

Alo lohe Mary ude mi darw’-pyabya dopa hwla wpw’la da’kele añjel ako áafi. Mary bíilo añjel kapa kaka yamanw aluñla bwsopa mwkele añjel hw lu, “No bwsoyo, Mary. Nwmi Úì hw heñbola faañbodo ke. Qo nwmi pwyu aya akó bipake áafinw.”

Hwmi tapa lala Mary bwso kumapa añjel mi karw’la mw. Hojalo mò nw ja lupakayu hwla heñla da’kele añjel hw lu, “Úì hw nwmi faañbodo, ho no wqa milobo akó bwkiñdo. Hwka wqa mi no Jesus hwla amyañtofa.”

Mary hwmi tapalala heñdiñ-hemiñ da’tw’, “Qo milò hetvr imarañ pa, nwtañ pa wqa bwdatafi ho?” Hwla Mary ka henanw’mi kalala añjel hw lu, “Mary no haqwja henayo. Úì hw kapanw’mi mwlaswdo ke. Nwka wqa hw Úì ka Wqa ke.”

Añjel ka lunwñmi Mary goñka jija tala da’kele mò mi luko lubyañ bwfita, “Nwka barmw Elizabeth mwlañ oho milobo akó bwkiñdo. Elizabeth axáado ku, oho bwkudwma hwla miyu atañ heñzane. Hojalo sisi mò wqa gwdoku. Úì ka mwla maswnw haqwja zima ke.”

Mary añjel ka lunwñmi taje lamapa da’ne. Hojalo mò Úì mi heñje swfinwñ heñdibwdola lu, “Qo Úì mi heñjedo ke. Mò qwmi nw mwto hwci, qo hwmi mwci ke; nw lembo ho iñgw tafi, ho iñbo tafi ke. Nwka pwyu lukonwñ hw jijepa finedo heñdo.”

Ho añjel hw funeku hwdu. Heñdvr bwkele, Mary mò koñtw’ lwbañ xaqatola Úì mi heñpala dùumi.

Ho hatuñhe da’lala Mary wqa gwfiku. Joseph hwmi ciñpa lala nwtañpa yu hwla hefi. “Myw-milo busu marañpa Mary wqa gwdoko’da qo mò mi apa’swfilo” hwla Joseph heñfi. Hwka ayò ho Joseph ema bwkele añjel akó áala mò mi lu, “Mary mi no hemo-kamola mwdwka a, Joseph. Mary bwnw mwlañmi deñki ya ke. Moh Úì ka Wqa mi ke bwkiñdonw. Wqa mi Jesus hwla amyañtofa a.”

Joseph arò koñcida do guri’bwla añjel ka emako’ka lunwñmi heñpa. Ho mò háatwri’la Mary mi uroya pa heñri’la mw.

Hwka azañ ho surkara hw gañdaho ka miyu dunw hemi xwka la mw. Hopa Joseph zi Mary zi mò lu ka lemba Bethlehem ho amyañ kelw’ ko’dupa hwla iñ.

Bíilo azañho garw-paji ziyamatw’nw Joseph zi Mary zi alìpa Bethlehem ho iñ. Mary wqa gwde’pa’finwñ Bethlehem ho lohiñ-lope hepa iñci.

Bethlehem ho acibwkele dùuko-da’ko hetvr kapama pa mw. Henw-myanw ka ude ho mí atañ dùuja bwtoku la domi. Mary zi Joseph zi reqe-bwsupa’ la nw mwcinw hwla heñla da’kele miyu kone áala lu, “Nwzi aróo kapa ela ho. Dúuko zima loda ko’da qwka agiñ ho áato.”

Hwka miyu hw Mary zimi Joseph zimi iñgwla mó ka ude ho áagw. “Ude ura ho imíko zimata ka a. Nwzi gagvrpa’la so doda totwka a,” hwla lulala acò-amyò dúuko lañxa ako kakiñ.

“Paya paco,” hwla lulala Mary zi Joseph zi lañxa mi kakabwkele asi’ pa lwsi’ abuje domi. “Si gubu’ bu’ta imiko’pa ayakeñdo ke,” hwla heñlala azuru Úì mi heñpa bwdola imí.

Hwka ayò ka yofañ lwpa ja’ho Mary wqa milobo akó bw. Hwka wqa hw dumiñ wqa matw’; hwka wqa hw Jesus tw’. Mò kwdi-yapuñ, doha-dolo mi ka punw; mò raja atañ ka raja; mò miyu-mima mi ka kafuñ-kabyuñ nw’.

Neñke pwlo ka ayò lwpaja’ho bwko lalala wqa atúu hw Mary lo góòko bwtola imíla do. Lañxa hoka lwsi’ donw ho pufe byare apyu lalala wqa ka imíko’pa mwbi.

Mary zi Joseph zi tarv imí te’qa’ haku. Jesus mi wqa atúupa bwtw’ku hwla azuru hempyo tarv amw-arwmapa rwqa’-rwqa’ imíku hwdu.